شريف منير يرد على انتقادات فيديو دفاعه عن ابنته لأول مرة
رد شريف منير في مقطع فيديو على منتقدي ابنته بعد حلق شعرها، كما رد الفنان المصري لأول مرة على الفيديو الذي عرضه للانتقادات بعد ظهوره وهو يتحدث خلال تناول الطعام بطريقة استفزت البعض.
وقال شريف منير إنه لا يسمح لأي شخص بالتطاول على أبنائه ولفت إلى علاقته بابنته أسما قائلاً إنه رغم الاختلافات الدائمة بينهما إلا أنه لا يسمح لأي شخص بالتطاول عليها ويحرص على دعمها في قرارتها.
رد شريف منير على منتقدي ابنته
وعن ردوده الدائمة على استفزازات الجمهور: "أنا بدور بمنكاش على الكومنتات اللي فيها هجوم وقلة أدب وسفالة وبعملها بلوك وبحس بهدوء شديد بعد ما بعمل كدة لإن اللي بيهاجم ده ما يعرفش إن ده لم يؤثر فيا شعرة.. أنت بتشتم من ورا شاشة يا جبان".
ورداً على سؤال حول زواج ابنته بشخص يكبرها بفارق سن كبير قال شريف منير: "بمقاييس الحياة هناقشها، لكن فيه ناس كتير اتجوزت شباب خمورجي وبيمد إيده وفي واحد أكبر بيطبطب ويدلع، لكن هل هي هتقدر تكمل ولا لأ لو قالت آه خلاص قرارها"، وأشار إلى علاقته بابنته قائلاً: "أنا وأسما ناقر ونقير لكن اللي يقرب من بنتي آكله".
رد شريف منير على فيديو السمك
وكان شريف منير تعرض لانتقادات بسبب طريقة رده على الهجوم على ابنته بعد أن ظهر الفنان المصري وهو يرد على منتقديها خلال تناوله الطعام بطريقة أثارت اشمئزاز البعض وهو ما تطرق له الفنان المصري قائلاً: "هي كان فيها تعالي على الناس اللي قلت أدبها لكن الناس المحترمة اللي فهموني ما زعلوش مني لما عملت كدة أنا عارف آداب الأكل، وعارف إني لازم أدي اهتمام، لكن أنا كنت قاصد أعمل ده لما حد يقولي شوف بنتك القرعة لا أنت اللي ابن قرعة.. لأن أنت ما تعرفش إيه الأزمة اللي عندها ليه عملت كدة، ورغم كدة لما عملت ده أنا كان ليا تحفظ لكن ما تقربش ناحية ولادي لأن أنا مش فنان في اللحظة دي أنا أب واللي يقرب من عيالي آكله".
وكان شريف منير ظهر عبر حسابه الشخصي في مقطع فيديو أحدث ضجة مدافعاً عن ابنته قائلاً: "إيه الضجة والدوشة اللي إنتو عاملينها دي، كل ده علشان بنتي قصت شعرها قدام الكاميرا، إيه الغلط اللي عملته، تصرف عادي جدا مفهوش أي حاجة.. أوعوا تفتكروا إن أنا ممكن آجي على بنتي علشان خاطر أكسب رضاكم، دي بنتي اللي مليش غيرها واللي بحبها، وبالمناسبة اللوك عاجبني وأنا مبسوط منها أوي".
وأضاف موجهاً هجومه للساخرين من أسما منير: "الإخوة السادة الملايكة الصالحين، اللي عمالين يقلوا أدبهم ويشتموا، ويقولوا بتاخد تريند وأبوها معرفش يربيها، أنا بنتي متربية كويس جدا، وبتتصرف باللي هي حاسة بيه، المهم إنها مش بتؤذي حد، وقبل ما تتكلموا بصوا على نفسكو وعلى ولادكو وإخواتكو قبل ما تنتقدوا وتغلطوا.. ريحوا نفسكو وأهدوا شوية، اللي حصل من بنتي مش غلط، وهي حرة في نفسها، وبنتي عندها 36 سنة وأم ومسؤولة عن نفسها، أنا أب مسؤول إني أحميها، وهي حرة في تصرفاتها".
ووجه رسالة لابنته وقتها قال فيها: ""إنت شكلك زي القمر وكان حلو جدا، وبرافو عليكي إنك أخدت التريند، متسمعيش كلام حد ومتهتميش بكلام حد، وأنا مش مهتم بالكلام اللي بيتقال عني أو عليها".
وبعد تخلصها من شعرها ردت أسما شريف منير على الهجوم قائلة: ""مواجهتش والدي شريف منير لحد دلوقتي بعد حلاق شعري.. وطول الوقت على خلاف معايا ومبيحبش أي حاجة بعملها وبيضايق من تصرفاتي، والناس تصطاد في المياه العكرة".
المزيد:
